Staff GIG Abertawe yn Plymio dros Iechyd y Pelfis

Cyfnewidiodd staff o'r Tîm Wrogynaecoleg yn Ysbyty Singleton eu sgwrbs am wisgoedd nofio wrth iddynt gymryd rhan mewn trochiad môr iachusol i godi arian ac ymwybyddiaeth ar gyfer cronfa elusennol eu hadran.

Gwelodd y digwyddiad Dip for Dignity tua 20 o gyfranogwyr – aelodau staff yn bennaf, ynghyd â ffrindiau a theulu cefnogol – yn plymio i ddyfroedd Bae Caswell am 6yp nos Fercher 22ain Mai. Gyda'i gilydd, fe godon nhw swm trawiadol o £1,146 ar gyfer eu cronfa Elusen Iechyd Bae Abertawe.

Wedi'i drefnu gan dîm wrogynaecoleg ymroddedig yr ysbyty, dan arweiniad yr Ymgynghorydd Wrogynaecoleg Mrs Monika Vij, nod y digwyddiad oedd chwalu'r stigma ynghylch iechyd y bledren a'r coluddyn, cyflyrau sy'n aml yn cael eu cadw'n dawel er eu bod yn effeithio ar gynifer o bobl.

Bydd yr arian a godir yn cefnogi gwelliannau mewn gofal i gleifion â chyflyrau'r bledren a'r coluddyn, gan gynnwys buddsoddi mewn offer niwromodwleiddio ac adnoddau eraill nad ydynt yn cael eu hariannu'n rheolaidd gan gyllideb graidd y GIG.

Dywedodd Mrs Monika Vij, Ymgynghorydd Arweiniol mewn Wrogynaecoleg yn Ysbyty Singleton: “Mae cyflyrau’r bledren a’r coluddion – yn ogystal â phroblemau iechyd pelfig ehangach – yn cael effaith sylweddol ar ansawdd bywyd, ond maent yn parhau i gael eu tan-gydnabod ac yn aml yn cael eu camddeall.

“Mae digwyddiadau fel hyn nid yn unig yn hanfodol ar gyfer codi arian, ond hefyd ar gyfer annog sgyrsiau agored a helpu i chwalu’r stigma y mae cynifer o gleifion yn ei wynebu. Rydym yn hynod ddiolchgar i bawb sydd wedi cefnogi’r achos pwysig hwn.”

Dywedodd Ruth Jeffreys, Nyrs Glinigol Arbenigol yn y Tîm Wrogynaecoleg: “Roedd Dip for Dignity yn ffordd mor hwyl a grymuso o godi ymwybyddiaeth o iechyd y bledren a’r coluddyn — cyflyrau sy’n effeithio ar gynifer ond sy’n aml yn cael eu cadw’n dawel.

“Roedden ni’n ddiolchgar iawn am y gefnogaeth gan gydweithwyr, teulu a ffrindiau, ac rydyn ni mor falch y bydd yr arian a godwyd o fudd uniongyrchol i’n cleifion.”

Roedd y digwyddiad yn rhan o ymrwymiad ehangach y tîm i Gynllun Iechyd Menywod Llywodraeth Cymru, sy'n blaenoriaethu gwrando ar fenywod a chodi ymwybyddiaeth o faterion iechyd y pelfis.

Drwy ymgymryd â'r her trochi yn y môr, fe wnaeth y cyfranogwyr sbarduno sgyrsiau pwysig am ymataliaeth, prolaps, a chamweithrediad llawr y pelfis, a helpu i addysgu ffrindiau, teulu a chydweithwyr am y triniaethau a'r gefnogaeth sydd ar gael.

Bydd y Tîm Wrogynaecoleg yn parhau i arwain mentrau sy'n gwella gwasanaethau iechyd y bledren a'r coluddyn, gyda'r nod o normaleiddio trafodaethau a lleihau stigma i fenywod ledled Bae Abertawe.