Tynnu sylw at ymdrech, ymrwymiad ac effaith ein gwirfoddolwyr gwych

YN Y LLUN: Gwirfoddolwyr desg Ysbyty Treforys Cheryl Howe, Janet Davies, Morfa Owen a Gaynor Bevan.

Mae eu rolau'n amrywio o ddarparu cymorth emosiynol a chyngor i rieni yn yr uned newyddenedigol i gludo meddyginiaeth i gartrefi cleifion bregus - does dim amheuaeth bod gwirfoddolwyr Bae Abertawe werth eu pwysau mewn aur.

Ar hyn o bryd mae’r bwrdd iechyd yn elwa ar ymrwymiad 379 o wirfoddolwyr anhunanol sy’n rhoi o’u hamser a’u hymdrech i helpu ein gwasanaethau.

Maent yn amrywio o 17 i 88 oed, ond mae pob un yn rhannu un nod cyffredin - darparu cymorth i unrhyw un sydd ei angen yn ein hysbytai.

I nodi Wythnos Gwirfoddolwyr (Mehefin 1-7), rydym yn tynnu sylw at y gwaith anhygoel mae ein gwirfoddolwyr yn ei wneud o ddydd i ddydd i gynorthwyo ein staff yn eu rolau o ddydd i ddydd a’r cyhoedd sy’n dod drwy ein drysau.

YN Y LLUN: Gwirfoddolwr fflebotomi Taiwo Yanusa gydag aelodau o staff Julie John ac Ali Lyness.

Dywedodd Julia Griffiths, Cydlynydd Gwirfoddolwyr o fewn y Gwasanaeth Gwirfoddoli: “Hoffem gymryd y cyfle hwn yn ystod Wythnos Gwirfoddolwyr i ddweud diolch o galon i bob un o’n gwirfoddolwyr anhygoel.

“Er bod ganddyn nhw i gyd wahanol resymau dros wirfoddoli, maen nhw i gyd yn unigolion anhunanol ac ysbrydoledig sy’n rhoi o’u hamser yn rhydd i gefnogi ein cleifion, ein hymwelwyr a’n staff.

“Rydyn ni'n gweld enghreifftiau bob dydd ohonyn nhw'n mynd y tu hwnt i hynny i wneud y gorau o brofiad y claf.

 “Fel tîm, rydym yn cefnogi blaenoriaethau ansawdd y bwrdd iechyd i sicrhau bod ein gwirfoddolwyr yn gwneud gwahaniaeth lle mae’n cyfrif.

“Rydym yn gweithio gyda’r tîm cyngor nam ar y cof a’r tîm dementia i ddarparu arbenigedd i’r gwirfoddolwyr sydd bellach wedi dechrau yn ôl ar wardiau mewn rôl gweithgaredd yn Singleton. Mae gennym gynlluniau i ailadrodd hyn yn ysbytai Castell-nedd Port Talbot a Threforys.

YN Y LLUN: Jill Sandry yn gwirfoddoli yn y Bar Te Cemotherapi.

“Rydym hefyd yn gobeithio cefnogi mentrau atal cwympiadau allan yn y gymuned.”

Mae peth o waith ein gwirfoddolwyr ymroddedig yn cynnwys:

Adran Achosion Brys; Gwirfoddolwr Cefnogi Cyfoedion yr Uned Gofal Newyddenedigol; Cefnogwr Cyfoedion Bwydo Babanod; Awdioleg; Gyrwyr Cyflenwi Fferyllfa; Mentor Grŵp Adsefydlu Niwro; Gwirfoddolwr Llyfrau ar Glud; Gwirfoddolwyr Caplaniaeth; Cwrdd a Chyfarch; Adborth cleifion Gwirfoddolwyr; Gwirfoddolwyr Fflebotomi; Canolfan Adsefydlu Arbenigol; Gwirfoddolwr Gweithgareddau Ward; Gwirfoddolwr Bar Te Cemotherapi a Radiotherapi

Mae gwirfoddolwyr hefyd yn cymryd rhan yn y grwpiau canlynol:

Bwrdd Golygyddol; Grŵp Cyfeirio Anabledd; Pwyllgor Cyswllt Gwasanaethau Mamolaeth; EPP (Rhaglen Cleifion Arbenigol); Pwyllgorau Gofal sy'n Canolbwyntio ar yr Unigolyn yn y Gwasanaethau Canser; Eiriolwyr Bevan; Panel IPFR; Prosiect iechyd meddwl a lles.

 Mae’r gwaith hefyd yn ymestyn i Hosbis Tŷ Olwen, lle mae dros 20 o wirfoddolwyr yn darparu cefnogaeth hanfodol i staff a chleifion o fewn y Gwasanaeth Gofal Lliniarol Arbenigol.

Mae gwirfoddolwyr wedi derbyn hyfforddiant arbenigol i ddarparu cefnogaeth a chwmnïaeth ychwanegol i gleifion sy'n derbyn gofal diwedd oes.

YN Y LLUN: Gwirfoddolwyr desg Ysbyty Singleton Margaret Piper a Margaret Templeton.

Mae ei bar te hefyd wedi ailagor yn ddiweddar ar ôl cau yn ystod y pandemig Covid, gyda'i holl wirfoddolwyr yn dychwelyd i weini paned, sgwrs a chysur i'r rhai sydd ei angen fwyaf.

Mae Tŷ Olwen hefyd wedi croesawu ei wasanaeth gyrrwr gwirfoddol yn ôl, sydd am ddim i deuluoedd sy’n ymweld â’r uned cleifion mewnol a allai fod yn cael trafferth ymweld â’u hanwyliaid. Mae hefyd yn cefnogi cleifion cymunedol sy'n mynychu apwyntiadau cleifion allanol.

Dywedodd Helen Martin, rheolwr cymorth gwirfoddolwyr Hosbis Tŷ Olwen: “Mae Wythnos Gwirfoddolwyr yn rhoi’r cyfle amserol i ni nid yn unig ddathlu ein gwirfoddolwyr ond hefyd i dynnu sylw at y gwaith gwych y maen nhw’n ei wneud wrth gefnogi Tŷ Olwen a’r Gwasanaeth Gofal Lliniarol Arbenigol ehangach, a’u taflu i’r golwg.

“Mae’r adborth rydyn ni’n ei dderbyn bob amser yn gadarnhaol iawn ac mae’n galonogol i’n staff bod cleifion yn gallu cael rhywun gyda nhw pan maen nhw’n brysur gyda thasgau clinigol.

“Rydyn ni’n gwerthfawrogi eu hymdrechion a’u hymrwymiad gymaint – maen nhw’n ein helpu ni i ddarparu’r lefel o gymorth a gofal rydyn ni’n ei ddarparu i’n cleifion.”