Twrnamaint rygbi cyffwrdd merched i gefnogi Cais Curo Canser

Mae mam i ddau o blant yn gobeithio dychwelyd i'r cae rygbi ar ôl taclo canser.

Roedd Ruth Wearing yn aelod o dîm rygbi cyffwrdd merched Clwb Rygbi Bryncoch pan gafodd ddiagnosis o ganser yr ofari y llynedd.

Ond mae ei chyd-chwaraewyr wedi parhau i rannu'r gwerthoedd y mae'r gêm yn ymfalchïo ynddynt, gan ei chefnogi trwy gydol ei hamser ar y llinell ochr.

(Prif lun uchod: Cynrychiolwyr o rai o'r timau sy'n cymryd rhan yn y twrnamaint)

Dywedodd Ruth: “Cefais boen yn fy stumog fis Gorffennaf diwethaf ac yna teimlais lwmp, felly es at fy meddyg a’m hatgyfeiriodd am sgan uwchsain a ddarganfuodd goden.

“Awgrymodd meddygon fy mod wedi cael hysterectomi a gefais ddiwedd mis Medi ac, yn dilyn hynny, cadarnhaodd biopsi fod gennyf ganser yr ofari.”

Dechreuodd Ruth gwrs o gemotherapi, gyda thriniaethau bob tair wythnos.

Er gwaethaf yr heriau, mae'n gobeithio dychwelyd i chwarae rygbi cyffwrdd gyda'r tîm, o bosibl cyn gynted ag Awst, pan fydd y tîm yn un o 16 o bob rhan o ranbarth Bae Abertawe sy'n cymryd rhan mewn twrnamaint rygbi cyffwrdd merched.

Bydd cystadleuaeth Cais Curo Canser ar Faes Athletic Clwb Rygbi Aberafan yn y Talbot yn gweld ugeiniau o fenywod yn cystadlu yn erbyn ei gilydd yn y digwyddiad cyntaf o'i fath a drefnir gan Elusen Iechyd Bae Abertawe, elusen swyddogol y bwrdd iechyd.

Mae er budd apêl yr elusen Mynd y Filltir Ychwanegol ar gyfer Canser, sy'n anelu at godi £200,000 ar gyfer Canolfan Ganser De Orllewin Cymru yn Ysbyty Singleton.

Ychwanegodd Ruth: “Roeddwn i'n weddol ffit ac iach cyn i mi gael diagnosis, byddwn i'n mynd am dro a dosbarthiadau ffitrwydd.

“Tua blwyddyn ynghynt, roeddwn i wedi dechrau chwarae rygbi cyffwrdd, ac roeddwn i’n mynd i hyfforddi bob wythnos.

“Felly pan gefais y newyddion roedd yn sioc enfawr. Rydych chi'n meddwl gyda chanser, 'nid yw'n mynd i ddigwydd i mi', ond dydych chi ddim yn gwybod.

“Pan gefais wybod es i i fyd gwahanol, doeddwn i ddim yn ymwybodol o bethau fel y cap oer ar gyfer triniaeth i leihau colli gwallt er enghraifft.

“Rwyf wedi cael rhywfaint o ddolur a phoenau ac mae sgîl-effeithiau eraill wedi bod, ond os wyf wedi cael problemau mae’r nyrsys a’r meddygon a’r ymgynghorwyr wedi bod yno ac wedi gallu tawelu fy meddwl.

(Ruth, chwith, gyda Christy sy’n aelod o’r dîm Bryncoch Broncettes)

“Mae elusen Maggie’s a fy nghydweithwyr hefyd wedi bod yn gefnogol iawn.

“Mae wedi bod yn un o'r pethau anoddaf i mi ei wneud, ond ar wahân i fy nheulu a ffrindiau, rwyf hefyd wedi cael cefnogaeth gan y tîm rygbi.

“Fe wnes i ffrindiau newydd pan ymunais ac maen nhw wedi bod yno i mi, gyda cwtshes neu gardiau. Rwy'n dal yn y grŵp WhatsApp ac maen nhw'n anfon negeseuon yn gofyn a ydw i eisiau mynd am baned o goffi os ydw i'n teimlo'n barod amdano. Mae wedi bod yn gefnogaeth wych i wybod eu bod nhw yno. Mae'n debyg mai dyna hanfod rygbi.

“Rwyf wedi bod yn ôl i’w gwylio’n hyfforddi’n ddiweddar ac efallai pan fydd yn dod ychydig yn gynhesach efallai y gallaf ymuno eto. Mae’r twrnamaint rygbi cyffwrdd ym mis Awst; does dim sicrwydd y byddaf yn barod i chwarae gyda nhw bryd hynny, ond pwy a ŵyr? Byddaf yn sicr yn mynd i’w gwylio a’u calonogi.”

Mae Canolfan Ganser de-orllewin Cymru, yn cael ei rhedeg gan Fwrdd Iechyd Prifysgol Bae Abertawe ac mae’n darparu ystod o driniaethau GIG sy’n achub bywydau fel radiotherapi, cemotherapi ac imiwnotherapi.

Dathlodd ei 20fed pen-blwydd y llynedd a lansiwyd Mynd y Filltir Ychwanegol gan Elusen Iechyd Bae Abertawe, i goffau’r tirnod.

Bydd yr apêl yn cefnogi’r miloedd o gleifion o ardaloedd Bae Abertawe a Hywel Dda sy’n derbyn gofal yno bob blwyddyn, yn ogystal â pherthnasau a staff. Nod ei darged o £200,000 yw gwella gofal i gleifion, cefnogi eu teuluoedd, a darparu adnoddau ychwanegol i'r staff ymroddedig yn y ganolfan ganser.

Cynhelir rygbi cyffwrdd merched Cair Curo Canser ar ddydd Sadwrn 9fed Awst . Mae’n cael ei redeg yn bennaf gan wirfoddolwyr a bydd yn dibynnu’n helaeth ar nawdd i helpu i’w wneud yn un o’r digwyddiadau rygbi elusennol gorau yng Nghymru.

Ychwanegodd Cathy Stevens, o Elusen Iechyd Bae Abertawe: "Rydym yn gobeithio y gallwch ymuno â ni ar gyfer y Twrnamaint Cais Curo Canser, sy'n edrych i fod yn gystadleuaeth gyffrous o rygbi cyffwrdd merched gyda 16 o dimau lleol i gyd yn cystadlu am y tlws!

Rydym yn annog pawb i ddod i gymeradwyo'r chwaraewyr. Pris mynediad yw £5, gyda mynediad am ddim i blant. Mae'r gêm gyntaf yn cychwyn am 10yb.

Sylwch y gall parcio fod yn heriol, felly argymhellir rhannu ceir. Os na allwch fynychu ond eisiau cefnogi, gallwch gyfrannu trwy ein tudalen codi arian.

Dilynwch y ddolen hon os hoffech wneud rhodd.