Mae ein Hadran Achosion Brys yn brysur iawn ar hyn o bryd – dyma rai lleoedd eraill i gael y gofal sydd ei angen arnoch.

Mae ein Hadran Achosion Brys yn hynod o brysur – dyma rai lleoedd eraill i gael y gofal sydd ei angen arnoch.

Mae ein Hadran Achosion Brys bob amser yn brysur, ond ar hyn o bryd mae dan bwysau eithafol oherwydd y galw ychwanegol am ein gofal, gyda'r ffliw a salwch arall sy'n gysylltiedig â'r gaeaf yn lledaenu'n eang ledled y gymuned.

Felly meddyliwch yn ofalus cyn dod i'r Adran Achosion Brys - mae yna nifer o ddewisiadau eraill a all ddarparu'r gofal a'r gefnogaeth sydd eu hangen arnoch. Fodd bynnag, os oes gennych chi neu rywun annwyl salwch difrifol neu sy'n peryglu bywyd e.e. trawiad ar y galon, ataliad ar y galon, poenau yn y frest, strôc, diffyg anadl, colli gwaed yn drwm neu anaf difrifol, peidiwch ag oedi cyn ffonio 999 ar unwaith neu ewch i'n Hadran Achosion Brys, sydd wedi'i lleoli yn Ysbyty Treforys.

Ond os nad oes gennych chi unrhyw un o'r uchod, ble arall allai fod yn opsiwn llawer gwell ar gyfer cael cymorth?

Ewch i wefan 111 Cymru i wirio symptomau ac i gael cyngor ar ystod eang o gyflyrau, gan gynnwys y camau nesaf.
Cysylltwch â'ch meddygfa ond os oes angen help arnoch y tu allan i oriau gwaith, pan fydd eich meddygfa ar gau, ffoniwch 111. Mae'r Gwasanaeth Meddygon Teulu y Tu Allan i Oriau Gwaith ar waith pan fydd eich meddygfa eich hun ar gau, dros nos a 24 awr ar benwythnosau a gwyliau banc. I gael mynediad at y gwasanaeth, unwaith eto, ffoniwch 111.
Ewch i'ch fferyllfa gymunedol leol i gael cyngor a thriniaeth ar gyfer ystod eang o anhwylderau cyffredin. Mae llawer o fferyllfeydd hefyd yn darparu gwasanaeth prawf a thrin dolur gwddf i'r rhai chwech oed a hŷn.
Poen deintyddol/deintgig - Cysylltwch â'ch deintydd eich hun gan y gallant ddarparu triniaeth frys. Os nad ydych wedi cofrestru gyda phractis neu os oes problem yn datblygu y tu allan i oriau gwaith arferol, ffoniwch 111 a byddant yn eich helpu i ddod o hyd i'ch deintydd brys agosaf.
Ewch i'n Huned Mân Anafiadau (UMA) yn Ysbyty Castell-nedd Port Talbot. Fe welwch Ysbyty Castell-nedd Port Talbot yn Ffordd Baglan, Port Talbot, SA12 7BX.
Gall yr Uned Mân Anafiadau drin unrhyw un un oed a hŷn. Mae'n debyg y cewch eich gweld yn llawer cyflymach yma nag yn yr Adran Achosion Brys yn Ysbyty Treforys ond cofiwch, dim ond ar gyfer anafiadau bach y mae'r uned hon. Rhaid i chi BEIDIO â mynd i'r UMA gydag amheuaeth o drawiad ar y galon/ataliad ar y galon, poenau yn y frest, strôc neu salwch difrifol, neu anaf difrifol. Mae gwneud hynny'n hynod beryglus gan nad oes gan yr uned feddygon ac NI ALL eich trin.
Noder - oherwydd pwysau staffio, mae oriau agor yr Uned Mân Anafiadau wedi newid dros dro i 8yb-9yh, saith diwrnod yr wythnos.
Mae cymorth iechyd meddwl 24/7 ar gael dros y ffôn ym Mae Abertawe. Gall pobl sy'n byw yn Abertawe a Chastell-nedd Port Talbot sydd angen cymorth brys gyda phroblemau iechyd meddwl ffonio tîm o weithwyr proffesiynol iechyd meddwl am ddim, ddydd neu nos. Mae ffonio 111 a dewis opsiwn 2 yn rhoi galwyr mewn cysylltiad uniongyrchol â thîm o 20 o weithwyr proffesiynol iechyd meddwl sydd wedi'u lleoli yn Ysbyty Castell-nedd Port Talbot. Mae'r gwasanaeth ar gael i unrhyw un yn Abertawe a Chastell-nedd Port Talbot sydd â phryder iechyd meddwl, gan gynnwys perthnasau sydd angen cyngor.