Fideos newydd i gefnogi pobl sy'n cael eu hatgyfeirio i'r ysbyty gydag amheuaeth o ganser

Bydd cael gwybod y gallai fod gennych ganser a bod angen atgyfeiriad brys arnoch i gael gwybod un ffordd neu'r llall yn un o'r adegau mwyaf pryderus ym mywyd unrhyw un.

Nawr mae cyfres o bum fideo wedi'u creu sy'n cynnig gwybodaeth a chefnogaeth ac yn grymuso pobl i wneud newidiadau cadarnhaol i'w hiechyd, tra byddant yn aros am eu hapwyntiad.

Mae'r fideo cyntaf yn esbonio'r broses atgyfeirio frys - ac yn pwysleisio sut nad yw'r rhan fwyaf o bobl sy'n cael eu hatgyfeirio i'r ysbyty fel hyn yn cael diagnosis o ganser. Mae'r fideos eraill yn trafod rheoli pryder a ffyrdd o wella iechyd a lles cyffredinol, gan gynnwys gweithgaredd corfforol, maeth ac ymdrin ag arferion niweidiol.

Mae'r prosiect wedi cael ei arwain gan Dr Gemma Eccles, Arweinydd Clinigol Canser Gofal Sylfaenol Baeau Abertawe, gyda chefnogaeth Jo Horton, Therapydd Ymgynghorol ac Arweinydd Therapïau Canser.

Credir mai'r fideos yw'r cyntaf i gynnig cyngor optimeiddio iechyd i bobl sydd wedi cael eu hatgyfeirio i'r ysbyty ar lwybr brys lle mae amheuaeth o ganser.

Esboniodd Gemma: “Mae ein tîm adsefydlu ym Mae Abertawe wedi cydweithio â’n grŵp hygyrchedd cleifion ac amrywiol weithwyr gofal iechyd proffesiynol i gynhyrchu’r fideos hyn sydd bellach wedi’u cymeradwyo gan y Tîm Canser Cenedlaethol.

“Ni fydd y mwyafrif helaeth o gleifion sy’n cael eu hatgyfeirio i’r ysbyty ar lwybrau brys ar gyfer canser a amheuir yn cael diagnosis o ganser. Ond yn ddealladwy, gall cleifion deimlo’n eithaf pryderus a diymadferth ar yr adeg hon gan eu bod yn poeni y gallent gael canser.

“Roedden ni eisiau eu grymuso i allu gwneud newidiadau cadarnhaol i’w hiechyd a defnyddio eu hamser aros i ddod mor ffit â phosibl cyn cael eu gweld. Roedden ni hefyd eisiau cynnig cyngor ar reoli’r teimladau pryderus a’r pryder y gall aros am apwyntiad brys eu hachosi.

“Hyd yn oed os nad ydyn nhw, diolch byth, yn cael diagnosis o ganser, mae’r amser hwn yn dal i fod yn gyfle gwych i bobl feddwl am eu ffordd o fyw a gwneud newidiadau os oes pethau y gallant eu gwneud i wella eu hiechyd.”

Ychwanegodd Jo: “Yn aml, gellir rhoi apwyntiadau brys lle mae amheuaeth o ganser ar fyr rybudd. Roedden ni eisiau gwneud fideos i baratoi pobl ar gyfer yr hyn i’w ddisgwyl fel eu bod nhw’n gallu paratoi’n well ar gyfer eu hapwyntiad.

“Rydym yn gobeithio y bydd gwylio’r fideos yn cynnig rhywfaint o sicrwydd i gleifion sy’n aros i gael eu gweld, yn ogystal â rhoi rhai awgrymiadau syml ar gyfer gwella eu hiechyd a rheoli’r pryder a all ddod gyda chael atgyfeiriad brys.”

Mae'r fideos bellach wedi cael eu cymeradwyo gan y Tîm Canser Cenedlaethol, Perfformiad a Gwella GIG Cymru. Dywedodd datganiad gan eu Tîm Arweinyddiaeth Uwch: “Mae cyfathrebu clir â chleifion a sicrwydd yn hanfodol i'r rhai sy'n cael eu hatgyfeirio i'r ysbyty ar lwybr brys ar gyfer canser a amheuir.

“Rydym yn croesawu cynhyrchiad y fideos dwyieithog hyn gan Dr Gemma Eccles a thîm Bwrdd Iechyd Prifysgol Bae Abertawe. Rydym yn hyderus bod y wybodaeth yn adlewyrchu canllawiau cenedlaethol ac y bydd y fideos o fudd i gleifion a chlinigwyr ledled Cymru.”

Mae'r fideos ar gael i'w gwylio ar wefan BIP Bae Abertawe drwy'r adran 'Aros yn Iach', ac maent hefyd ar gael wedi'u grwpio gyda'i gilydd ar restr chwarae YouTube: https://www.youtube.com/playlist?list=PLZCo7SZSH_W4PMnWHQqLCUeAtcvvjjLP3

Gellir eu gweld yn unigol hefyd drwy'r dolenni isod:

Saesneg:

Eich atgyfeiriad brys amheus o ganser

Rheoli eich teimladau wrth aros am eich apwyntiad brys

Gweithgarwch corfforol wrth aros am eich apwyntiad brys

Rheoli ysmygu ac alcohol wrth aros am eich apwyntiad brys

Bwyta'n dda wrth aros am eich apwyntiad brys#

Cymraeg:

Eich atgyfeiriad brys gall a amheuir

Rheoli eich cyfrifon wrth aros am eich brys

Gweithgarwch Corfforol wrth i chi aros am eich apwytiad brys

Rheoli ac alcohol wrth aros am eich prosiect brys

Bwyta'n dda wrth aros am eich taflen brys