Clinig newydd yn helpu i uwchsgilio myfyrwyr a gwella mynediad i gleifion

Mae optometryddion yn hogi eu sgiliau ac yn helpu i leihau amseroedd aros i gleifion fel rhan o gyfleuster addysgu newydd yng Nghastell-nedd Port Talbot.

Mae'r clinig addysgu a thrin yn helpu i hyfforddi optometryddion, a fydd yn gallu darparu'r gwasanaeth rhagnodi annibynnol i gleifion yn y dyfodol.

Mae staff yn hyfforddi optometryddion cymwys a chofrestredig sy'n astudio ar gyfer eu cymhwyster rhagnodi annibynnol.

Mae hyn yn caniatáu i optometryddion wneud diagnosis, rheoli a thrin amrywiaeth o gyflyrau llygaid.

Mae'n golygu y gall cleifion yn aml dderbyn eu gofal yn gynt ac yn agosach at adref gan ei fod yn dileu'r angen iddynt gael eu hatgyfeirio i'r ysbyty.

Yn y llun: Uwch optometrydd ysbyty Kelly Pitchford a'r cynghorydd optometreg Mohammed Islam.

Byddai myfyrwyr sy'n dod i'r clinig, sydd wedi'i leoli yn Ysbyty Castell-nedd Port Talbot, eisoes wedi cwblhau arholiadau damcaniaethol fel rhan o'u cwrs prifysgol.

Mae'r clinig addysgu a thrin yn rhan o'u lleoliad, lle gallant ddatblygu portffolio i ddangos sut maen nhw wedi cefnogi a thrin cleifion.

Kelly Pitchford yw'r uwch optometrydd ysbyty sy'n darparu'r hyfforddiant yn y clinig.

Dywedodd: “Mae’r holl fyfyrwyr hyn wedi cwblhau eu harholiadau damcaniaethol, a’r cam nesaf yw mynychu lleoliad lle mae angen iddyn nhw gwblhau 24 sesiwn.

“Yn ystod y sesiynau, maen nhw’n ennill gwybodaeth ymarferol a gallant adeiladu portffolio i ddangos eu bod nhw wedi gweld y nifer gofynnol o gleifion.

“Unwaith y byddant wedi cwblhau’r elfen ymarferol, maent yn mynd yn ôl i’r brifysgol i gwblhau trydydd cam eu hyfforddiant sef arholiad terfynol.

“Os ydyn nhw’n gymwys yna gallant wneud cais i allu presgripsiynu yn y gymuned.”

Cymhwysodd Maisie Evans fel optometrydd o Brifysgol Caerdydd yn 2019 ac mae hi bellach yn gweithio yn Bater & Stout Opticians, yn Nhreforys.

Ers hynny mae hi wedi derbyn hyfforddiant yn y clinig addysgu a thrin fel rhan o'i chymhwyster ôl-raddedig.

“Roeddwn i’n teimlo bod yr hyfforddiant yn addysgiadol ac yn ddefnyddiol iawn yn fy nhaith rhagnodi annibynnol,” meddai.

“Roedd yr hyfforddiant yn cynnwys gweld ac archwilio pob claf ochr yn ochr â chreu cynllun rheoli a thriniaeth.

“Roedd yn dda bod yr holl gleifion a welsom wedi cael eu sgrinio felly dim ond cleifion y byddem yn eu gweld mewn lleoliad cymunedol yr oeddem yn eu gweld.

“Yr offeryn mwyaf defnyddiol a gefais o’r profiad oedd gwybod sut i ysgrifennu fy mhresgripsiynau fy hun yn hyderus, gan fod hyn yn rhywbeth roeddwn i’n nerfus am ei wneud cyn i mi ddechrau.

“Mae’r clinig yn ffordd ardderchog i fyfyrwyr presgripsiynu annibynnol ddysgu ac ymgyfarwyddo â chyflyrau y byddant yn eu gweld yn y gymuned.

“Yn y pen draw, bydd hyn yn annog mwy o optometryddion i gymryd rhan ac yn helpu i leihau’r straen oddi ar staff yr ysbyty.”

Cyflwynwyd y clinig hyfforddi yn ardal Castell-nedd Port Talbot i helpu i wella mynediad at bresgripsiynwyr annibynnol i gleifion sy'n byw yn yr ardal.

“Mae gennym nifer gynyddol o optometryddion rhagnodi annibynnol yn y gymuned ond mae llawer ohonyn nhw wedi’u lleoli yn ardal Abertawe,” ychwanegodd Kelly.

“Fe benderfynon ni sefydlu’r clinig addysgu yn Ysbyty Castell-nedd Port Talbot er mwyn i gleifion gael mynediad haws at y gwasanaeth.

"Sefydlwyd y clinig mewn partneriaeth ag Ysgol Optometreg a Gwyddorau Golwg Prifysgol Caerdydd.

“Mae’r clinig wedi darparu lleoliad ychwanegol i gleifion yn yr ardal gael eu cyfeirio ato.

“Rydym hefyd yn gobeithio, unwaith y bydd y myfyrwyr yn graddio, y bydd yn helpu i greu mwy o ddiddordeb yn y dyfodol iddynt ymarfer yn ardal Castell-nedd Port Talbot.”

Mae gallu rheoli mwy o gleifion yn y gymuned nid yn unig o fudd iddyn nhw, ond hefyd i'r ymgynghorwyr sydd wedi'u lleoli yn yr ysbyty a all dreulio eu hamser yn gweld cleifion eraill.

Dywedodd Mohammed Islam, cynghorydd optometreg ar gyfer y bwrdd iechyd: “Mae hyn yn helpu i ddod â mwy o wasanaethau i’r gymuned i gleifion.

“Rydym yn helpu cleifion i gael eu gweld yn agosach at adref yn lle gorfod mynd i Ysbyty Singleton am ofal llygaid brys.

“Bydd y clinig yn helpu i uwchsgilio’r proffesiwn a darparu gwasanaethau i helpu i leihau’r ôl-groniad o bobl sy’n aros i gael eu gweld.”