Gohiriwyd rhywfaint o lawdriniaethau a drefnwyd oherwydd pwysau Covid

Mae Bwrdd Iechyd Prifysgol Bae Abertawe yn gohirio rhywfaint o ofal wedi'i gynllunio mewn ymateb i bwysau Covid-19.

Dywedodd Chris White, Prif Swyddog Gweithredu:

“Mae pwysau cynyddol Covid-19 yn golygu bod yn rhaid gohirio rhywfaint o lawdriniaethau a drefnwyd ym Mwrdd Iechyd Prifysgol Bae Abertawe i ryddhau gwelyau ac adnoddau ar gyfer gofal brys.

Bydd llawdriniaethau orthopaedig a drefnwyd yn Ysbyty Castell Nedd Port Talbot o ddydd Llun, Rhagfyr 14, bellach yn cael eu gohirio. Rydym yn cadw'r sefyllfa dan adolygiad parhaus, a byddwn yn eu hail-drefnu cyn gynted ag y gallwn yn y Flwyddyn Newydd.

Rydym yn cysylltu â'r cleifion yr effeithir arnynt yn uniongyrchol ac yn ymddiheuro am y trallod a'r siom y bydd hyn yn eu hachosi. Cyn gynted ag y byddwn mewn sefyllfa i ail-ddechrau llawdriniaethau orthopaedig dewisol byddwn yn cysylltu â nhw gyda dyddiadau newydd ar gyfer eu llawdriniaethau.

Ni fydd hyn yn effeithio ar drawma brys a llawfeddygaeth orthopaedig, a fydd yn parhau yn Ysbyty Treforys, ac efallai y bydd rhai o'r cleifion mwyaf brys a oedd i fod i gael eu trin yn Ysbyty Castell-nedd Port Talbot bellach yn cael eu llawdriniaethau yn Nhreforys yn lle. Fodd bynnag, nid yw'n bosibl symud holl restr weithredu Castell-nedd Port Talbot i Dreforys.

Bydd llawfeddygaeth ddydd yn Ysbyty Castell-nedd Port Talbot yn parhau gan nad oes angen gwelyau ar gyfer y grŵp hwn o gleifion.

Bydd gohirio llawdriniaeth orthopaedig a drefnwyd yn Ysbyty Castell-nedd Port Talbot yn rhoi mynediad inni at welyau ychwanegol, sydd eu hangen yn fawr gan fod nifer yr heintiau Covid-19 yn codi yn lleol ac yn rhoi pwysau sylweddol ar wasanaethau'r GIG.

Rydym hefyd yn gohirio pob apwyntiad cleifion allanol wyneb yn wyneb nad ydynt yn hanfodol, ac ar hyn o bryd mae pob arbenigedd yn penderfynu ar ba sesiynau y bydd yn cael eu gohirio. Cysylltir â'r cleifion yr effeithir arnynt yn uniongyrchol. Fel arall, dylai cleifion barhau i fynychu eu hapwyntiad.

Gofynnwn i'r cyhoedd wneud popeth o fewn eu gallu i'n helpu trwy gymryd camau i gadw'r cyfraddau trosglwyddo i lawr:

• Osgowch ymweld â phobl nad ydych chi'n byw gyda nhw;
• Golchwch eich dwylo neu defnyddiwch gel alcohol yn aml;
• Gwisgwch orchudd wyneb mewn mannau cyhoeddus dan do; a
• Chadwch bellter diogel oddi wrth bobl eraill. ”